درنو مېلمنو!!

د افغاني ټولنې د كلتور او ادب د ډګر ځلانده ستورى ارواښاد استاد خادم كلونه، كلونه پخوا ويلي وو چې كامه كوچنى يونان دى، د استاد دا وينا رښتيا شوه، د كامې سمسورې لمنې په خپل غېږ كې د علم، پوهنې، ادب او كلتور داسې ځلانده څېرې وروزلې چې نه يوازې په ملي بلكې په نړيواله كچه هم زموږ د افغاني ټولنې وياړنې شوې.

له دغه شمېر څڅه يو هم د سياست، ادب او ادارې د ډګر نامتو او وتلى څېره شهيد موسى شفيق دى.

شهيد موسى شفيق يو هر اړخيزه شخصيت وو، چې په دې لنډ او تنګ پيغام كې د هغې څېړنه نه كېږي، يوازې د څو ټكو لنډه يادونه كوو:

كه څه هم د شهيد شفيق د صدارت دوره لنډه وه خو پايلې يې ډېرې سترې او ارزښتمنې دي. د لومړي ځل لپاره د كابينې د غونډو پرېكړې د دولتي او ازادو مطبوعاتو په واك كې وركړ شوى. د كابينې له غونډې وروسته به د كابينې د غونډو منشي او د وخت د اطلاعاتو او كلتور وزير ارواښاد صباح الدين كشككي د غونډې پرېكړې د مطبوعاتو په واك كې وركولى.

بل ټكى چې د شهيد شفيق تلپاتې ياد تازه كوي له آزادو مطبوعاتو څخه ملاتړ دى، هغه پرېكړه وكړه چې آزاد مطبوعات دولتي اعلانونه او اشتهاراتو له لارې پياوړي كړي، د دولتي اعلانونو دېرش سلنه يې د اونيزو او شل سلنه يې د ورځپاڼو په واك كې وركړه.

د هېواد د اقتصادي بنسټ په پياوړتيا كې د شهيد شفيق د سترو كارنامو څخه يوه داده، چې د افغانستان په تاريخ كې د لومړي ځل لپاره د هېواد د صادراتو كچه ۱۱۷ مليونو ډالرو ته ورسېده.

د هغه د صدارت په بهير كې د دوو سوو صنعتي موسسو د جوړېدو غوښتنليكونه راورسېدل چې له دغه شمېر پنځه اتيا موسسې ومنل شوې، ۲۵ صنعتي موسسو په اغېزمنه توګه كار پيل كړ، چې غوره بېلګه يې د كابل صنعتي پارك دى چې د شهيد شفيق د صدارت په دوران كې رسماً پرانستل شو.

شهيد شفيق نه يوازې د صدارت په دوره كې د كورني سياست د چلولو اغېزمنه مهره وه، بلكې په نړيوال سياسي ډګر كې د درناوي او وياړنې څېره هم وه.

د ملت بابا په خپلو خاطراتو كې ويلي دي:

((شفيق د ټولو صدر اعظمانو څخه د صدارت ښه شرايط درلودل، قابل شخصيت وو، ما څو ځلي هغه وازمايه، يو وخت راسره لندن ته لاړ زه په پارلمان كې له يوې كوچنۍ ډلې سره غږېدم، چې د هغه وخت د انګليس د بهرنيو چارو وزير راته وويل: زه د منځني ختيځ په اړه دومره معلومات نه لرم لكه څومره مې چې په لږ وخت كې ستا له صدر اعظم څخه واورېده او ما ترې ډېره ګټه واخيسته. دا د شهيد شفيق د سياسي پوهې او درايت څرګنده بېلګه ده.

درنو لوستونکيو!!

د حضرت مراد علي صاحبزاده (رح) فرهنګي او اجتماعي ټولنه چې خپل فرهنګي فعاليتونه يې په دې وروستيو كې راپيل كړي، د اطلاعاتو او كلتور وزارت ددغه نيك قدم او اقدام هركلى او مننه كوي، همدارنګه د حضرت مراد علي صاحبزاده (رح) فرهنګي او ټولنيزه ټولنې د خپل خپرنيز ارګان د مراد مجلې نوې ګڼه د شهيد موسى شفيق د كارنامو او خدمتونو په وياړ نومولې ده.

دغه ټولنه وړانديز كوي چې ۱۳۸۷ هـ ش كال د شهيد شفيق د زېږېدو ۷۹ كاليزه ده، هيله ده چې په دغه وياړ د يو څېړنيز سيمينار د جوړېدو تكل وشي، ځكه موږ باور لرو چې نامتو او منلي شخصيتونه د يادونې يوه نېټه لري د زېږېدو نېټه، داسې شخصيتونه تلپاتې وي.

يو ځل بيا د اطلاعاتو او كلتور وزارت مشرتابه او اړوندو څانګو څخه چې ددغې درنې غونډې د جوړولو زيار يې پر ځان منلى مننه كوو.

په درناوي

د حضرت مراد علي صاحبزاده (رح) د فرهنګي او اجتماعي ټولنې مشرتابه پلاوى