که‌سیڤ بمانؤ

گیڵناڤه‌ و ماچا زه‌مانه‌و ره‌زاشای دۆڵه‌ت جه‌ چند قؤڵیڤه‌  هجووم مارو په‌ی سه‌رو هۆرامانوو لهونی و شونه‌و چند جه‌نگاره‌ و به‌ ده‌سیسه‌ نۆسوودی گیرؤ. نۆسووده‌ چا وه‌خته‌نه‌ یاگی ده‌سه‌ڵاتداری جافرسانی بؤ. به‌ گیریای نۆسوودی حاکمی هۆرامانی پاشه‌ کشی که‌را و گوزاری ئه‌سڵی مازا جیا و کیشیاڤه‌ په‌ی لاده‌گایه‌کا دۆر و به‌ری. نیروو ره‌زاشای ده‌س که‌رؤ به‌ یاگی وی هه‌سه‌م که‌رده‌ی و پی بؤنۆ  گنؤ جاده‌ کیشته‌ی په‌ی نۆسوودی. سه‌روو تونه‌یله‌کی ئۆلا دواوی بؤنه‌و سه‌ختی ڕاکیڤه‌ ماڤیڤ ماتڵیشا بؤ. چا نزیکانه‌ کابرێڤی ساده‌ به‌ نامی (قؤربانی) به‌ قسی ده‌سه‌ڵاتی ره‌زاشایی خه‌ڵه‌تیؤ و  بؤ  به‌ چه‌م ساخوو سپاو شای. گنؤ وه‌ڵی سه‌رڤازا و زؤر مارؤ ئۆ به‌گزادا هۆرامانی.

چی ڕه‌م و ڕومانه‌ ئۆڵغه‌فوور به‌گ (کوڕوو جافرسانی) که‌ وه‌ختوو ویش حاکموو ده‌گاو کومه‌ده‌ره‌ی بیه‌ن گلیرؤ و ده‌سیڤش مه‌ڕیؤ. چیروو ده‌سوو شکسته‌ به‌ندیه‌نه‌ و  جه‌ گه‌رمه‌و ئیشیه‌نه‌ ئی شیعریشه‌ په‌ی مێ و ماچؤ:

که‌سیڤ بمانؤ   زه‌مانه‌ش پیر بؤ

خوژه‌و هه‌لامه‌ قؤربانیش ویر بؤ

 

خؤژه‌و هه‌لامه‌, گیڤاڤی خؤراکیینی و پاسه‌ دیارا  ئۆلغه‌فوور به‌گ چا وه‌خته‌نه‌ ڤه‌روو فره‌ وارده‌یشا ده‌سشاڤه گله‌ییش بیینی ‌.

جا ماچا زه‌مان ڤیه‌رؤ و ڕه‌زاشا جه‌ پیوه‌ن چه‌نی جه‌نگی دوه‌می جه‌هانیه‌نه‌ شار به‌ده‌ر کریؤ و به‌گزادی گیڵاڤه‌ و ده‌سه‌ڵات پیدا که‌راڤه‌. پاسه‌ مێ ڤه‌رۆ، قوربانی چا لا پرده‌و کوڕانه‌ بؤ  به‌ دامیۆ. به‌ ده‌سووروو ده‌سه‌ڵاتی وه‌ریسه‌ مارا و بینانه‌ چیروو باڵاش و  دڤه‌ سه‌روو وه‌ریسه‌کی ئیده‌س و ئۆده‌سوو رؤخانه‌یۆ گیرا و وه‌ش وه‌ش قوربانی مژه‌نا ئاڤه‌کیره‌‌. ته‌ماشاچییچ گرد جاریڤه‌نه‌ و به‌ کؤڕ موانا: که‌سیو بمانؤ و زه‌مانه‌ش پیر بؤ.....

چامای سه‌روو داڤاو  ته‌ماشاچیا قؤربانی ڤه‌ر مدریؤ.

 

داره‌کڤه‌